नेपाल क्रिकेट संघ (क्यान) द्वारा मान्यता प्राप्त आधिकारिक प्रतियोगिता नेपाल टी–२० क्रिकेट लिग अहिले काठमाडौंमा चलिरहेको छ । लिगमा विदेशी खेलाडीदेखि नेपाली राष्ट्रिय तथा अन्तर्राष्ट्रिय खेलाडीको सहभागिता रहेको छ ।
डिसेम्बर २४ बाट सुरु भएको लिगमा कुल ३६ खेल हुनेछन् र जनवरी ११ मा समापन हुनेछ । तर, मङ्गलबारको २१औँ खेल केही घण्टा ढिलो गरी पारिश्रमिकको माग गर्दै खेलाडीहरूले विरोध गरेपछि स्थगित भएको थियो ।
काठमाडौं नाइट्सका कप्तान ज्ञानेन्द्र मल्लले आफ्नो टोलीका कुनै पनि खेलाडीले खेल शुल्क नपाएको बताएका छन् । मंगलबार काठमाडौं नाइट्स र विराटनगर सुपर किंग्सबीचको खेल सुरु हुनुअघि नै खेलाडीले विरोध गरेका थिए ।
खेलाडीले पारिश्रमिक नपाएको भन्दै विरोध गरेपछि निर्धारित समयमा खेल सुरु हुन सकेन । नेपाल क्रिकेट संघ (क्यान)ले खेलाडीलाई पारिश्रमिक उपलब्ध गराउने आश्वासन दिएपछि खेलाडीहरु खेल्न राजी भएका थिए ।
कीर्तिपुरस्थित त्रिभुवन विश्वविद्यालयमा आयोजना हुने बहुप्रतिक्षित प्रतियोगिता नेपाल टी–२० लिगमा धेरै प्रश्न उठेका छन् । क्रिकेटको सञ्चालक निकायले मान्यता पाएको एउटा मात्र आधिकारिक टी–२० लिग हुने बहानामा क्यानले नेपालमा अन्य सबै टी–२० फ्रेन्चाइजीलाई यो लिग गर्न प्रतिबन्ध लगाएको थियो । क्यानले लिग आयोजना गर्न भारतीय कम्पनी सेभेन थ्री स्पोर्ट्सलाई जिम्मा दिएको थियो ।
कप्तान ज्ञानेन्द्र मल्लले तलबको विषय क्यानसँग टिम व्यवस्थापन र आयोजक समक्ष उठाएको र बुधबारसम्म तलब उपलब्ध गराउने आश्वासन दिएपछि खेल्न राजी भएको बताए ।
विराटनगरका कप्तान तथा नेपाली राष्ट्रिय टोलीका कप्तान रोहितकुमार पौडेलले पनि क्यानले बुधबारसम्म विदेशी खेलाडीसहित सबै खेलाडीको पूरै पारिश्रमिक बुझाउने प्रतिबद्धता गरेको बताए ।
आयोजकसँगको झडपका कारण निर्धारित समयभन्दा अगावै स्वदेश फर्किएका विदेशी खेलाडीमा असन्तुष्टि बढेसँगै प्रतियोगितालाई लिएर धेरै प्रश्न उठ्न थालेका छन् ।
प्रतिक्रिया दिनुहोस्