भरतपुर महानगरपालिका–१५ मा निर्माणाधीन गौतमबुद्ध अन्तर्राष्ट्रिय क्रिकेट रंगशालाको ऋण तिर्न नसक्दा काम अघि बढ्न सकेको छैन ।
कलाकार सिताराम कट्टेल (धुर्मुस) र कुञ्जना घिमिरे (सुन्तली)द्वारा सञ्चालित धुर्मुस–सुन्तली फाउन्डेसनले रकम अभाव र १८ करोड रुपैयाँ ऋण तिर्न नसकेपछि रंगशाला निर्माण रोकेको हो ।
भरतपुर महानगरपालिकाले त्रिभुवन विश्वविद्यालयको नाममा रहेको र कृषि तथा वनविज्ञान विश्वविद्यालयले प्रयोग गरेको २० बिघा ६ काठा जग्गा रंगशाला निर्माणका लागि उपलब्ध गराएको छ ।
भरतपुर महानगरपालिकाकी मेयर रेणु दाहालले रंगशाला निर्माण गर्दा लागेको चर्को ऋण कसरी तिर्ने भन्ने प्रष्ट कानुनी व्यवस्था नभएकाले समस्या देखिएको बताइन् ।
भरतपुर महानगरपालिका र फाउन्डेसनबीच २०१९ माघ ३० गते भएको सम्झौता अनुसार रंगशाला निर्माण सम्पन्न भएपछि वा स्रोतसाधन उपलब्ध नभएमा तत्काल सरकारलाई हस्तान्तरण गरिने उल्लेख छ ।
मेयर दाहालले रङ्गशाला निर्माण गर्दा कर्जाको जिम्मा कसले लिने भन्ने सम्झौतापत्रमा उल्लेख नभएकाले समस्या भएको बताए ।
‘रङ्गशालाको ऋण तिर्नुपर्छ, त्यसको समाधान खोजिरहेको छ,’ उनले भनिन् । मेयर दाहालले प्रधानमन्त्री र युवा तथा खेलकुदमन्त्री, नेपाल सरकारका मुख्य सचिव र खेलकुद मन्त्रालयका सचिवसँग निर्माण कार्यको प्रगतिबारे छलफल भइरहेको बताए ।
रंगशाला निर्माणका लागि सङ्घीय सरकारले २२ करोड र प्रदेश सरकारले ५० करोड रुपैयाँ विनियोजन गरेको छ भने भरतपुर महानगरपालिकाले आन्तरिक राजस्वबाट ८० करोड रुपैयाँ खर्च गरिसकेको छ । निर्माणका क्रममा भएको ऋण चुक्ता गर्ने बाटो नभेट्दा काम रोकिएको दाहालको भनाइ छ ।
रङ्गशाला निर्माण महानगरको प्राथमिकतामा रहेको बताउँदै उनले सरकारको तर्फबाट ऋण तिर्न सक्ने व्यवस्था नभएको खण्डमा फाउन्डेसनले तिर्न अर्को अभियान थाल्नुपर्ने बताए ।
फाउन्डेसनले निर्माणको जिम्मा लिए पनि राजधानी भरतपुर महानगरपालिकाले परिचालन गरिरहेको थियो । फाउन्डेसनले महानगरलाई रंगशाला हस्तान्तरण गर्दा ३५ प्रतिशत काम सकिएको थियो ।
प्रतिक्रिया दिनुहोस्