कोभिड–१९ को महामारीका कारण तीन वर्षभन्दा लामो समयपछि चीनले नेपालसँगको रसुवागढी नाकालाई सीमापार मानव आवतजावतका लागि खोल्ने सहमति गरेको छ ।
नेपालले गत मार्च २०२० मा कोरोना संक्रमण फैलिन नदिन देशव्यापी बन्दाबन्दी घोषणा गरेपछि व्यापार, मानव आवतजावतलगायत सबै गतिविधिका लागि केही महिनासम्म सीमा नाका बन्द गरिएको थियो ।
वर्षौंदेखि चीनले बिस्तारै नेपाललाई सीमा नाकाबाट सामान आयात गर्न अनुमति दिएको थियो र सन् २०२२ को डिसेम्बरमा मात्रै नाका दुईतर्फी व्यापारका लागि खोलिएको थियो ।
त्यसको तीन महिनापछि दुई देशले रसुवागढी नाका हुँदै सीमापार आवतजावत गर्न दिने सहमति गरेका थिए । यो निर्णय शनिबार (अप्रिल १) देखि लागू हुनेछ ।
ल्हासामा जारी नेपाल–चीन सीमा व्यापार तथा सहयोग समन्वय संयन्त्रको बैठकमा दुई देशका अधिकारीले सो सम्झौता गरेका हुन् ।
आजको बैठक सकिएपछि यस सम्बन्धमा औपचारिक घोषणा गरिने अधिकारीहरुले बताएका छन् । उद्घाटन कार्यक्रममा सहभागी हुन केही पदाधिकारी ल्हासाबाट सिधै केरुङ जाने गरेको वाणिज्य तथा आपूर्ति मन्त्रालयका एक अधिकारीले बताए ।
बैठकमा नेपाली प्रतिनिधिमण्डलको नेतृत्व वाणिज्य तथा आपूर्ति सचिव मधुकुमारी मरासिनीले गर्नुभएको थियो ।
प्रतिक्रिया दिनुहोस्