नेपाली सेनाको बम डिस्पोजल टोलीले बुधबार काठमाडौंको सिनामंगलमा बम निष्क्रिय पारेको छ । बम बम नभएको नेपाली सेनाले जनाएको छ ।
नेपाली सेनाका सूचना अधिकारी कृष्णप्रसाद भण्डारीले नोकिया मोबाइलमा तार जोडेर बम जस्तो देखाउन कालो टेपले बेरिएको भेटिएको जानकारी दिए ।
सिनामंगल पुल नजिकै खोटाङ हलेसी ज्वेलर्सको शटर अगाडि आज बिहान शंकास्पद वस्तु फेला परेको थियो ।
कालो टेपले बेरिएको र टाँसेको तार बम भएको आशंकामा नेपाली सेनाको बम डिस्पोजल टोली बोलाइएको थियो । तर उक्त वस्तु बम नभई डर पैदा गर्नका लागि राखिएको पाइएको छ ।
स्रोतका अनुसार बम फेला परेको सिनामंगलस्थित घरका मालिक किशोर यादवलाई पाँच लाख रुपैयाँ मागेर धम्की दिएको बताए । उनले फिरौती दिन अस्वीकार गरेपछि उनको पसल अगाडि बम फेला परेको थियो ।
सीसीटीभी फुटेजमा आज बिहान ७ बजेतिर एक व्यक्ति शंकास्पद वस्तु लिएर हिँडिरहेको देखाइएको छ । सीसीटीभी फुटेजका आधारमा प्रहरीले एकजना अभियुक्तलाई पनि पक्राउ गरेको छ ।
प्रतिक्रिया दिनुहोस्