काठमाडौं — भारत र पाकिस्तानबीच चुलिँदो तनावसँगै नियन्त्रण रेखा (एलओसी) नजिकका सीमावर्ती क्षेत्रमा भारी गोलीबारी भइरहेको छ। निरन्तरको झडपका कारण सर्वसाधारण नागरिकहरू सुरक्षित स्थानतर्फ विस्थापित भएका छन्।
भारतले कश्मीरको पहलगाममा पर्यटकमाथि भएको आक्रमणपछि पाकिस्तानले युद्धविराम उल्लंघन गर्दै आएको आरोप लगाएको छ। पाकिस्तानले ७४० किलोमिटर लामो एलओसीका विभिन्न स्थानमा आक्रमण गरिरहेको बताइएको छ।
भारतका अनुसार, मे ७ तारिख बिहान भएको हवाई आक्रमणपछि सुरु भएको गोलीबारीमा हालसम्म १६ जनाको मृत्यु र ५९ जना घाइते भएका छन्। मृतकमध्ये महिलाहरू, बालबालिका र भारतीय सेनाका एक जवान पनि छन्।
गोलीबारीका कारण विद्यालय, अस्पताल र बजारहरू बन्द गरिएका छन् भने जनधन, सम्पत्ति र मवेशीमा क्षति पुगेको छ। भारतीय राज्य पञ्जाबमा ड्रोन र मिसाइलका टुक्रा भेटिएपछि त्यहाँ त्रास फैलिएको छ।
भारतले पाकिस्तानबाट प्रक्षेपित धेरै ड्रोन र मिसाइलहरू नष्ट गरिएको दाबी गर्दै मे ८ मा लाहौरस्थित हवाई सुरक्षा प्रणाली ध्वस्त पारेको जनाएको छ, यद्यपि पाकिस्तानले यसको पुष्टि गरेको छैन।
प्रतिक्रिया दिनुहोस्